(১)
বৰষুণমুখৰ ৰাতি
মানুহজনীৰ নৰিয়া
দুৱাৰদলিত মানুহটোৰ
উচ্ পিচ্
বৈদ্যই ক’লে__
নোৱাৰিলোঁ
ৰাতিৰ ৰাতিটো মানুহটো
বৰষুণৰ প্রেমত মজি থাকিল !
(২)
লচ্ পচ কৈ
সাজি-কাচি তাই ওলায় যায়
ভায়েকক দুইশ্রেণী
পঢ়ুৱাব লাগে
বয় বস্তুৰো যি হে
জুই চাই দাম
ৰংচঙীয়া পোহৰৰ
ৰাতিবোৰত
তাই আন্ধাৰৰ
প্রেমত ডুবি থাকে !
(৩)
বাপেকৰ হাপানী
বেমাৰটোৱে উক দিছে
কলেজৰ ডিগ্রিটোৰ
কথা সি পাহৰিছে
বন্ধকীত থকা
দ-পথাৰৰ মাটিখিনি মোকলাব লাগে
আত্মহননৰ
উকমুকনিটোৰ নেলু চেপি
সি নতুনকৈ জীৱনৰ
প্রেমত পৰিছে !
(৪)
গাত ৰ’দ বৰষুণ
নলগা মানুহজনী
বাটৰ কাষত পৰি
থাকিয়েই মাক হ’ল
আজিকালি তাই ছাটি
এটা মেলি লয়
কোনোবাই সুধিলে
কয়
পেটৰ পোৱালিটো সাইলাখ
বাপেকৰ দৰে !
(৫)
প্রতিশ্রুতিবোৰ
সোঁৱৰণি মাথোঁ
তিনি সইত খাই
কৈছিল সি পাহৰি যাব
জোনাকী ৰাতিৰ
প্রেমত মজি উচুপি উঠে
অভিমানৰ পুখুৰীত
ডুবি তাই আগুৱাই দিছে নেকি দুওঁঠ
অচিনাকী কাৰোবাক
!
(৬)
শিলৰ চোলা এটা
নিপিন্ধাকৈ
কোনোবা কিদৰে শিল
হ’ব পাৰে ?
বৰষুণত তিতা
হাঁহিটোৰ তলত তাই লুকুৱাই থ’লে
পানীৰ বেজি এটা
নোপোৱাৰ কথাটো
নিঃসংগতাৰ স’তে
এতিয়া তাইৰ সহজ সহাৱস্থান !
0 Comments