তুমিতো নুবুজা মোৰ গোপন
অশ্রুৰ ইতিহাস
মৌনতাৰ হাহাকাৰ, অনুচ্চাৰিত
প্রার্থনা ;
চুই চাব নোৱাৰা
দুচকুৰ সমুদ্রনীল বিষণ্ণতা ।
কিমান কৰিম
আত্মপ্রৱঞ্চনা ?
কাম্য নহয় মোৰ
হৃদয়হীন মৃন্ময়
মিলন, স্পন্দনহীন সহবাস ।
আছে নেকি তোমাৰ ওচৰত
সতীত্বৰ সংজ্ঞা ?
সতী কোন ?
পাঞ্চালী নে মীৰাবাঈ
?
ৰাধা নে জনক কন্যা ?
আছে যদি কোৱা
শৰীৰহীন হৃদয় আৰু
হৃদয়হীন শৰীৰৰ পৃথক সংজ্ঞা !
নুবুজিবা তুমি...
মোৰ বাবে জীৱনৰ সকলো
যন্ত্রণাই এতিয়া অপ্রাসংগিক,
স্বনির্বাসিত মই
নিজৰেই বুকুত ।
হয়তো সেয়ে
স্বাভিমানেৰে ক’ব
পাৰোঁ__ ‘অন্তৰেৰে অসতী মই’ ।
0 Comments